ناس كتير في بداية جوازها بتفضل أنها تسكن في شقق صغيرة ولأسباب مختلفة..زي مثلا ان مساحتها كويسة بالنسبة لاتنين متجوزين ولسة مخلفوش دة غير ان تكاليفها بتكون أقل..وفي ناس بتفضل الشقق الصغيرة برضه عشان ترتيبها بيكون أسهل…..الخ. وزي ما احنا عارفين اختيار الديكور بيكون محير ومش سهل وبالذات في الشقق الصغيرة اللي مساحتها بتبدأ من 60 متر..فعلشان كدة قررنا نقولك على خطوات تساعدك في اختيار ديكور بسيط وأنيق وكمان يدي شكل أوسع لشقتك:

ديكورات شقق صغيرة 60 – 100 متر

الاضاءة:

• الاضاءة جزء أساسي من ديكور البيت وعامل رئيسي في الاحساس بمساحة الشقة لأنه كل ما بيكون الضوء أفتح وأكتر، كل ما هتحسي براحة أكتر وهتحسي كمان ان شكل بيتك أوسع.

الألوان:

• الألوان الفاتحة من أكتر الحاجات اللي بتخلق بهجة وسعادة في البيت ودة لأنها بتساعد في دخول الضوء للبيت وبتخلي شكله أوسع. فيفضل انك تختاري الألوان الفاتحة للحيطان والعفش زي: اللون الأبيض والبيج واللون الأصفر والفستقي الفاتح والسيمون…الخ.

ازاي تختاري ديكور أنيق للصالة وفي نفس الوقت تحافظي على مساحة شقتك؟

المطبخ:

• “المطبخ الأمريكي” من أكتر الحاجات اللي عليها طلب الفترة دي لأن شكله بيكون بسيط وأنيق وكمان بيديكي الوسع اللي انتي عايزاه لأنه بيكون مفتوح على الصالة.

العفش:

• خليكي عملية في اختيارك للعفش..يعني مثلا ممكن تستخدمي الترابيزة اللي بتفتح وبتتقفل بدل السفرة لأنها بتكون خفيفة ومش هتاخد مساحة كبيرة من شقتك وممكن تنقليها لمكان تاني في حالة لو جالك ضيوف علشان مساحة بيتك تكون أكبر.

• قللي من استخدام الكنب في غرفة المعيشة لأنه بياخد مساحة كبيرة واستفيدي من المساحة الباقية بانك تحطي كراسي عادية.

• الكنبة اللي بتتحول لسرير بتكون مهمة جدا في حالات الضيافة لأنها بتشيل عدد كبيرمن الناس وبكدة استخدامك للكراسي اللي ممكن تزحملك الشقة هيكون أقل.

• العفش الشفاف من أكتر الحاجات اللي بتميز البيوت الصغيرة ودة لأنه شكله بيكون مختلف وبتدي انطباع بأن الشقة واسعة.

الأرضيات:

• استخدمي الأرضيات الباركيه أو السيراميك بدون سجاد لأنه بيضيق مساحة الصالة.

النباتات:

• النباتات من اكتر الحاجات اللي بتدي شكل مختلف وجميل للبيت وكمان بتدي للناظر شعور بوسع المكان.

ازاي تختاري ديكور مناسب لغرف النوم؟ 

السراير:

• لو عندك أطفال، استخدمي سرير بدورين في أوض النوم بدل ما تشتري سريرين منفصلين..وبكدة شكل أوضتك هيكون أوسع.

مساحات التخزين:

• من أهم الحاجات اللي تستخدميها في الشقق الصغيرة، مساحات التخزين ودي بتكون معمولة عشان تحطي فيها كل حاجتك وغالبا بيكون مكانها تحت السرير.

المرايا:

• وجود المرايات الكبيرة في الغرف من أكتر الحاجات بتدي وسع للأوض وكمان بتسمح بدخول الضوء بشكل كويس.

الرفوف:

• الرفوف المتثبتة على الحيطة بتكون مفيدة جدا في أوض النوم الصغيرة لأنها بتغنيكي عن الدولاب اللي بياخد مساحة كبيرة من الأوضة؛ الرفوف ممكن تحطي عليها كل كتبك واكسسواراتك وممكن كمان تعلقي عليها الهدوم، وبكدة هيبقى شكل أوضتك أنيق ومنظم ومساحته أكبر.

• اشتري الرفوف اللي ممكن تتحول لمكتب ودي من الأفكار الذكية اللي هتساعدك توفري فلوسك وتوفري مساحة أكبر لشقتك.

• الرفوف كمان بتكون مفيدة في الحمامات لأنها بتساعدك تحطي فيها فرش السنان والشامبو والصابون وممكن تستفيدي منها كمان بانك تحطي فيها كل حاجتك اللي ممكن تزحملك البيت وبكدة بيتك هيكون شكله أرقى وأوسع.

نصائح عامة لاختيار الديكورات في غرف النوم:

• الشماعات المتعلقة عالحيط بتكون مهمة جدا في أوض النوم لأنها بتوفرلك مساحة كبيرة ومبتاخدش مكان في أوضتك وممكن تعلقي فيها اكسسواراتك وجزمك كمان…وبكدة مش هتحتاجي تستخدمي دولاب ولا جزامة.

• دولاب المطبخ بيستهلك مساحة كبيرة وبيخلي شكله أضيق. علشان كدة أحسن حل ليكي أنك تعلقيهم بالشكل دة علشان يبقوا علطول قدام عنيكي..وبكدة هتضيفي لمسة جمالية لمطبخك كمان وهيبقا شكله منظم أكتر وأوسع.

• الدولاب بياخد مساحة كبيرة من غرفة النوم، فممكن تخصصي مكان لجزمك في جنب السرير ودة هيساعدك توفري فلوسك كمان.

• السلات المثبتة عالحيط بتكون مهمة جدا في الأوض الصغيرة وناس كتير بتستخدمها بدل الجزامة.

• لو دولابك صغير وهدومك كتير، ممكن تستخدمي شماعات مصنوعة من أنابيب “بي في سي” اللي بتكون مكانها ورا الباب. ودي بتكون مفيدة جدا في أوض النوم.

وأخيرً، دي مجموعة من الأفكار الجديدة لديكورات شقق صغيرة جدا اللي ممكن تعملوها علشان توفروا مساحة لو شققكوا صغيرة جدًا. اللي بيميز الأفكار  دي أنها أفكار ديكورات مودرن وعملية ومش مٌكلفة وأي حد ممكن يعملها حتى لو في أوضة واحدة في الشقة.