ديكورات المطابخ والحمامات ليها دور مهم في إحساسك بالراحة والنشاط في البيت. ولأن عناصر الديكور فيهم عبارة عن مجموعة تفاصيل كتير من إضاءة وخامات وأدوات وألوان وأشكال للسقف والأرضيات وغيره، بروبرتي فايندر جمعتلك كل ده في مكان واحد.  ولو عايز تعرف أكتر عن موضة السنة دي في باقي ديكورات البيت، تابع: أحدث ديكورات غرف النوم والمعيشة 2019.

ديكورات المطابخ 2019

المطبخ هو أهم جزء في الشقة بالنسبة للست، وهي دايما بتهتم ان مطبخها يكون نضيف ومساحته واسعة عشان تتحرك براحتها، هنعرفك بأجدد موضة في خامات واشكال والوان المطابخ تختارى منها على ذوقك.

ألوان المطابخ

• الديكور الكلاسيك: الموضة في المطابخ الكلاسيك السنة دي هو دمج اللون البني مع الأخضر الباستيل، أو اللون الروز مع الأبيض.

• الديكور المودرن: ألوان الباستيل الناعمة وأهمها الأبيض لسه مستحوذين على الموضة السنة دي، وممكن خلط أكتر من لون منهم زي الروز والرمادي.

إضاءة المطابخ

• الديكور الكلاسيك: بتكون عبارة عن نجفة كبيرة في نص السقف، أو “مصابيح متدلية” من السقف بالألوان الباستيل الناعمة.

• الديكور المودرن:  بتكون عبارة عن مجموعة “سبوتات” فوق البوتاجاز أو حوض الأطباق، أو ممكن تكون متعلقة في إطار في نص سقف المطبخ بنفس ألوان الحيطة.

مكونات المطابخ

الموضة السنة دي في خامات المطابخ هى المطابخ الخشب اللي فيها اماكن لكل ادوات المطبخ زي البوتاجاز والحوض.

انواع الاخشاب اللي ممكن تستخدميها في المطبخ هي الارو: وهو اغلاهم، بس ممكن تدمجي قشرة الارو مع خشب الكونتر الجود وود.

أو ممكن تستخدمي الخشمونيوم اللي هو الوميتال مع خشب عادي عشان تجمعى بين سهولة الطبخ وسهولة التنظيف.

كمان ممكن تستخدمي بعض أجزاء المطبخ من الاكريليك مع الخشب.

• الديكور الكلاسيك: بتكون قطع المطبخ بنفس خليط ألوان الحيطة، ومعاها أرفف جانبية للأطباق، شفاط خاص بالبوتاجاز، وترابيزة بنفس لون الحيطة في نص المطبخ.

• الديكور المودرن: السنة دي التركيز على جودة وعملية المطبخ نفسه بأقل عدد من القطع، وبيكون الحوض والبوتاجاز جزء من قطع المطبخ علشان نوفر مساحة.

ديكورات سقف وأرضيات المطابخ

• الديكور الكلاسيك: السقف بيكون بسيط من اللون الأبيض، أو مزخرف بالجبس حول أركان السقف.

• الديكور المودرن: السقف سادة بألوان باستيل تليق بألوان الحيطة، أو اللون الأبيض، ولو في مساحة تساعد ممكن نزود زخرفة من جبس للسقف.

ديكورات الحمام 2019

الحمام شئ أساسي في كل بيت، ولأنه بيعد واجهة للضيوف في البيت وبينقل ذوق أهل البيت ليهم، فلازم نهتم أنه يكون دايمًا شكله حلو وعلى الموضة.

ألوان الحمام

• الديكور الكلاسيك: الجديد السنة دي هى الحمامات الأنيقة والبسيطة في نفس الوقت، ونفس الكلام ينطبق على الألوان، عشان كده السيراميك من مزيج اللون البيج أو البني مع الأوف وايت هو المنتشر السنة دي، والسيراميك نفسه بيكون منقوش بنقشات عصرية وأنيقة.

• الديكور المودرن:السيراميك الأبيض مسيطر السنة دي، وممكن يتضاف حيطة من السيراميك بنقشة الرخام الأبيض مع الأسود، أو “بلاط الأكسبلاش” اللى فيه أشكال صغيرة متداخلة من الحجر عشان يشد العين.

إضاءات الحمام

• الديكور الكلاسيك: الإضاءة بتكون هادية بتعتمد على نجفة في نص السقف، و”اباجورات” جانبية متعلقة فوق الحوض.

• الديكور المودرن: الاضاءة بتكون عبارة عن “سبوت” فوق البانيو، و”اباجورات” صغيرة فوق الحوض.

ديكورات أسقف وأرضيات الحمام

• الديكور الكلاسيك:  السقف من اللون البيج مع وجود زخارف من الجبس حول الأركان، والارضيات من السيراميك اللى الوانه فاتحة وفي النص بتكون مجموعة مختلفة من البلاطات عاملة شكل هندسي متناسق.

• الديكور المودرن: السقف من اللون الأبيض السادة، والموضة في أرضيات الحمام المودرن هى الالوان الغامقة زي الأسود او حسب لون جدران الحمام.