* التشطيب الجيد غالبا ما يعكس الشخصية و المستوي الاجتماعي،
يجعل البيت مكان اجمل لصنع ذكريات مع العائلة يصبح مكان ملئ بالثقة و الراحة و الجمال .

* للتشطيب مراحل متعددة وعلشان نوصل لتشطيب زي اللي بنشوفه في التلفزيون .. واللي بيعمله مهندسين متخصصين .. لازم نتبع نفس الخطوات وبنفس الترتيب .. والاهم من كدة اننا نعمل كل بند صح لان كل بند بيتعمد علي اللي قبلة .. بمعني لو عاوز محارة مظبوطة لازم تبقي المباني مظبوطة ولو عاوز نقاشة مظبوطه لازم المحارة تبقي مظبوطة يعني مينفعش تكون مرحلة النقاشة هى البداية .
والتشطيب الجيد بنراعي فيه الجانب الوظيفي والجانب الجمالي للفراغ سواء ( غرفة – صالة – ممر – مطبخ )

* أولا تعالوا نفرق بين أنواع التشطيب الثلاثه وهى:

_ بدون تشطيب
يعنى الشقة على الطوب الأحمر و مطلوب مننا اننا نعمل كل خطوات التشطيب الـ8 من أول التكسير و المبانى لحد الدهانات .

_ نصف تشطيب
يعنى الشقة فيها ( محارة – حلقان النجارة – مواسير كهرباء من غير سلك – وصله مياه – وصله صرف ) و دى بتختلف على حسب البلد و المنطقة اللى انت فيها .

_ تشطيب كامل
يعنى الشقة فيها ( كهرباء تأسيس وتشطيب ” مواسير كهربا وسلك وعلب كهربا و وشوش كهربا ” – سباكة تأسيس وتشطيب – النجارة او الالوميتال شبابيك وابواب – دهانات – سيراميك ارضيات )

* السطور اللى فاتت اتكلمنا عن خطوات التشطيب بشكل مبسط و مختصر ، التشطيب 8 خطوات هنعرفهم دلوقتى و فى مقالات منفصله هنتكلم على كل خطوة بالتفصيل .

* خطوات التشطيب هى :

1 – التعديلات ( النحاته ” التكسير ” – المبانى )
في حاله استلمنا الشقة و في حاجة في تقسيمة الشقة مش عجباك غرفة صغيرة محتاجة نفتحها على غرفة تانيه ، تعديل في المطبخ او الحمام …. وهكذا

2- العزل
نظرا لارتفاع معدل الرطوبة في المطبخ والحمام علشان مواسير المياه والصرف ، و للحفاظ علي الغرف القريبة من المطبخ او الحمام و كمان علشان منضرش سقف الجار اللي تحتك بنلجأ للعزل . وده باستخدام مواد معينة توضع على الارض الخرسانية تمنع وصول المياه اليها وتحميها من التآكل .

3- السباكة
هى اعمال تأسيس و امداد مواسير الصرف و مواسير التغذيه .

4- الكهرباء
هى اعمال تأسيس و امداد الفراغات بالكهرباء و بعض المخارج زى مخارج التليفون و الانترنت و الدش و غيرها حسب رغبة صاحب الشقة

5- المحاره
هى تغطية حوائط و جدران الشقة بطبقة من المونة الاسمنتية حتى يصبح سطح الحوائط و الجدران مستوى وجاهز للمرحلة اللى بعدها من مراحل التشطيب .

6- الاسقف المعلقة
عند الرغبة في تغير شكل السقف و عمل بيت نور أو عمل شبكة كهرباء او تكييف نحتاج لعمل سقف زائف لتغطية كل الاسلاك او للوصول لتصميم جديد للسقف فنستخدم الاسفق المعلقة لهذا الغرض

7- الارضيات
مرحلة تغطيه الارض الخرسانيه بـ ( بلاط _ سيراميك _ بورسالين _ رخام _ باركيه ) لتكون مناسبة للحياة اليومية العاديه

8- النقاشة والدهانات
هى عملية تجهيز الحوائط للدهانات بالألوان والأنواع والأشكال المطلوبة حسب الرغبة